Himara me projekte për turizëm për fshatrat Dhërmi e Vuno

Kryetari i Bashkisë së Himarës, Jorgo Goro, ka prezantuar projektet e transformimit dhe rrjetëzimit të fshatrave të Dhërmiut dhe të Vunoit për rritjen e turizmit.

Ai i ka thënë ATSH-së se po punohet me intensitet për të finalizuar këto dy projekte të rëndësishme, që financohen nga qeveria shqiptare dhe Banka e Këshillit të Evropës dhe që do të krijojnë një dimension tjetër në funksion të turizmit në të gjithë zonën, përcjell albinfo.ch.

Sipas tij, këto investime, jo vetëm do të ndryshojnë pamjen e këtyre dy fshatrave, por do të ndryshojnë raportin me vlerat në tërësi të zonës. Aktualisht, puna në terren është në një fazë të avancuar dhe ritmet janë të kënaqshme. Goro sqaron se, në bashkëpunim me firmat që kryejnë punimet për zbatimin e këtyre dy projekteve, është ndërtuar një grafik që garanton ecurinë dhe përfundimin e tyre brenda muajit qershor të vitit të ardhshëm. Në fshatin Dhërmi, numërohen rreth 2600 shtëpi dhe godina të tjera, që janë pjesë e procesit të rikonstruksionit, ndërkohë që në Vuno, numri i tyre shkon në rreth 230.

Fshatrat e Dhërmiut dhe Vunoit, së bashku edhe me Kuçin dhe Lukovën, në bashkinë e Himarës, janë përfshirë në Programin Kombëtar të qeverisë shqiptare “100 Fshatrat”, që synon të realizojë modele zhvillimi të integruar.