Hoxha kërkon nga Fajon vendimmarrje më të shpejtë për vizat

Ministrja Dhurata Hoxha po qëndron në Bruksel, sot kur po mbahet takimi i Komisioni LIBE ku do të diskutohet dhe nesër do të votohet për liberalizimin e vizave për Kosovën.

Gjatë qëndrimit në Bruksel, ministrja Hoxha takoi eurodeputeten nga Sllovenia, Tanja Fajon, Anëtare e Aleancës Progresive të Socialistëve dhe Demokratëve, Raportuese për Kosovën në Parlamentin Evropian, përcjell albinfo.ch.

Në takim, ministrja Hoxha ka vënë në dukje plotësimin e të gjitha kushteve për liberalizim nga udhërrëfyesi si dhe pritjet për vendimet pozitive për liberalizimin e vizave, sidomos pritjet që komisioni LIBE të votojë nesër pro liberalizimit.

“Fajon, ishte me vite një përcjellëse besnike e të arriturave dhe interesave të Kosovës, edhe tash, mirëpresim kontributin e saj si Raportuese në Parlamentin Evropian, duke rikonfirmuar të arriturat tona për liberalizimin e vizave, procesin integrues dhe lobimin për njohjen e shtetit dhe shtetësisë tonë në organizatat ndërkombëtare”, theksoi Ministrja Hoxha.

Ndërsa Fajon citohet të ketë thënë se është e lumtur që po rikonfirmohen të arriturat e Kosovës, se qytetarët e Kosovës do ta gëzojnë lëvizjen e lirë ashtu si krejt qytetarët tjerë të Evropës.