Implementimi i ligjeve: pika kritike e raportit të Progresit

Përfaqësuesit e institucioneve të Kosovës besojnë se Raporti i Progresit për 2011 do të jetë më pozitiv, falë edhe angazhimit institucional për përmbushjen e shumë sfidave të përmendura në Raportin e Progresit të vitit të kaluar.

Edhe aspekti i miratimit të ligjeve të kërkuara nga Komisioni Evropian, sipas drejtuesve të Ministrisë së Integrimeve Evropiane është plotësuar mjaft.

Zëvendësministri i Integrimeve Evropiane, Gëzim Kasapolli ka deklaruar se Qeveria e Kosovës ka bërë të pamundurën që t’i plotësojë të gjitha kërkesat, të cilat paraqiten në Raportin e Progresit, raporton Kosovapress.

Kurse njohësit e integrimeve evropiane deri më tash kanë vlerësuar se nuk mund t’i dërgohen Kuvendit të Kosovës 20 apo më shumë ligje dhe t’i kërkohet që t’i miratojë për një javë, pasi që duhet të ketë një afat kohor për shqyrtimin e atyre ligjeve.

Sidoqoftë, sipas tyre çështja e miratimit të ligjeve, nuk do të jetë pika kritike në Raportin e Progresit, por shkalla e implementimit të këtyre ligjeve dhe ndërtimit e kapaciteteve efektive administrative, të cilat do duhej të merreshin me implementimin e këtyre ligjeve.

Në Raportin e Progresit të vitit 2010 është kërkuar miratimi i 49 ligjeve, ndërkohë Qeveria deri tani i ka dorëzuar në Kuvend afër 40.