Java e Kulturës së Kosovës në Berlin me ekspozitë të fotografit Arian Mavriqi

Mbrëmë në Ambasadën e Kosovës në Berlin u hap ekspozita e fotografit Arian Mavriqi, duke shënuar fillimin e Javës së Kulturës së Kosovës dhe 25-vjetorin e çlirimit të Kosovës. Ambasadori Faruk Ajeti theksoi rëndësinë e kësaj dite historike, duke nderuar të gjithë ata që kontribuuan drejt çlirimit, lirisë dhe pavarësisë së Kosovës, përcjell albinfo.ch.

Në këtë drejtim, i jemi mirënjohës rolit dhe kontributit të shtetit dhe popullit mik gjerman dhënë në ndër vite ndaj Kosovës.

Për të shënuar këtë datë të rëndësishme, kemi vendosur të organizojmë Javën e Kulturës së Kosovës, përmes disa aktiviteteve të rëndësishme që t`i japim jehonë kulturës tonë dhe vlerave që përfaqësojmë, u shpreh në mes të tjerash Ambasadori Ajeti.

Ndërsa, autori i fotografive, Arian Mavriqi foli rreth punës së tij dhe emocionet që japin fotografitë anekënd Kosovës. Mavriqi u shprehu mirënjohës që fotografitë e tij po prezantohen edhe në Berlin para publikut gjerman dhe diasporës shqiptare.

Ekspozita “Flasim përmes fotografisë” prezantoi peizazhe të mrekullueshme të Kosovës, të cilat shpërfaqin dhe zbulojnë thesaret natyrore të Kosovës.

Ekspozita do të jetë të hapur për publikun deri më 12 qershor, nga ora 12:00-15:00 në Ambasadën e Republikës së Kosovës në Berlin.