Lajme

Jep dorëheqje kryetarja e Bashkisë së Durrësit

Kryetarja e Bashkisë së Durrësit ka dhënë dorëheqje, pas deklaratës se “ishte e kënaqur me 50 viktima”.

Në një intervistë ekskluzive të dhënë ditën e djeshme për gazetaren e Top Channel, Anila Hoxhën, Valbona Sako është shprehur që duhet të jemi të kënaqur me 50 viktima, për arsye se në raste të tjera kanë mundur të jenë mbi 1,000 viktima.

Sako ka dhënë lajmin për largimin e saj, duke u shprehur se ishte tepër e lënduar nga reagimet negative ndaj prononcimit që ajo bëri ditën e djeshme.

“E lënduar nga reagimi i madh negativ ndaj një prononcimi që bëra, nën një stres që i kalon fuqitë e mia, jap dorëheqjen nga detyra e Kryetares së Bashkisë Durrës. Falënderoj nga zemra të gjithë ata që më besuan dhe shpresoj në mirëkuptimin e të gjithëve”, thuhet në reagimin e Sakos, shkruan TCH, përcjell albinfo.ch.