Kantonet frankofone penalizohen për qasjen e “butë” ndaj migrantëve

Pjesa më e madhe e dënimeve ka prekur kantonin Vaud, që sipas Keller-Sutter, ka humbur 4 milionë franga për shkak të konstatimit të 204 rasteve të tilla

Qeveria Federale e Zvicrës ka bërë shkurtimin e disa subvencioneve nga niveli federal për katër kantone frankofone, si rezultat i dështimit të tyre për të dërguar azilkërkuesit në vendet e tjera evropiane në pajtim me “rregullat e Dublinit” të BE-së, – raporton gazeta “Le Matin Dimanche”.

Ministrja e Drejtësisë dhe Policisë, Karin Keller-Sutter i ka deklaruar parlamentit javën që shkoi se qeveria e vendit kishte anuluar 6 milionë franga të subvencioneve federale për kantonet në fjalë, si dënim për dështimin në largimin e këtyre emigrantëve.

Sutter nuk i ka emërtuar në mënyrë të veçantë kantonet. Por Le Matin ka raportuar të dielën se fjala është për kantonet frankofone në Zvicrën perëndimore – Neuchâtel, Gjenevë dhe Valais.

Pjesa më e madhe e dënimeve ka prekur kantonin Vaud, që sipas Keller-Sutter, ka humbur 4 milionë franga për shkak të konstatimit të 204 rasteve të tilla. Philippe Leuba, ministri kantonal i ngarkuar për këtë çështje, mohoi ekzistimin e shkeljes së rregullave.

“Kantoni Vaud kthen në radhë të parë njerëzit që kanë kryer ndonjë delikt, pastaj njerëzit e vetëm (pa familje) dhe në fund, familjet,” ka thënë ai për Le Matin Dimanche. “Kjo do të thotë se deportimet ndodhin ndoshta më ngadalë se sa gjetkë.”

Përfaqësuesit e kantonit të Neuchâtel gjithashtu pohuan se qeveria kantonale i ka respektuar plotësisht detyrat dhe përgjegjësitë e saj, raporton gazeta. Është raportuar se ky kanton ka humbur rreth 805.000 franga të  subvencioneve federale.

Sipas Marrëveshjes së Dublinit, e cila aplikohet nga Zvicra, përgjegjësia për përpunimin e kërkesave për azil bie në vendin ku azilkërkuesit kanë kërkuar së pari azil.

Ndërkohë, Nadia Boehlen, zëdhënëse e Amnesty International Switzerland, citohet nga Le Matin të ketë thënë se kantonet frankofone kishin kohë që kishin marrë një qëndrim të ndryshëm nga pjesët e tjera të Zvicrës mbi politikën e azilit.

“Ata i shohin pasojat njerëzore të kthimit të njerëzve, dhe jo vetëm ato të zbatimit të rreptë të ligjit,” i ka thënë ajo gazetës Le Matin Dimanche. “Dhe ata po paguajnë për këtë.”

Subvencionet kanë të bëjnë me periudhën nga tetori 2016 deri në fund të vitit 2018.

---