Kërkohet përjashtimi i gjyqtarit në rastin e Antigona Morinës

Për shkak të parregullsive të cilat kanë ndodhur në procesin e parë të gjykimit, nuk mund të lejojnë si mbrojtje e palës së dëmtuar që sërish i njëjti gjykatës ta udhëheqë këtë çështje penale kundër Hilmi Zenës

Mbrojtja e familjes së Antigona Morinës ka kërkuar nga Gjykata Themelore e Gjakovës, që gjykatësi i rastit Mizahir Shabani, të përjashtohet në procesin e rigjykimit, i cili do të nisë më 4 qershor.

Avokatja, Fehmije Gashi Bytyqi, ka thënë se për shkak të parregullsive të cilat kanë ndodhur në procesin e parë të gjykimit, nuk mund të lejojnë si mbrojtje e palës së dëmtuar që sërish i njëjti gjykatës ta udhëheqë këtë çështje penale kundër Hilmi Zenës.

Kjo kërkesë është iniciuar nga Rrjeti i Grave të Kosovës. Kërkesa bazohet në dyshimet e arsyeshme në mosobjektivitetin dhe paanshmërinë që ka shkaktuar gjyqtari në lidhje me rastin, thuhet në një njoftim të Rrjetit të Grave të Kosovës.

RrGK-ja përsëri u bën thirrje institucioneve të drejtësisë të ndërmarrin vendimet e duhura, në mënyrë që rasti të gjykohet drejt dhe të rritet besimi i qytetarëve ndaj këtyre institucioneve.