Lajme

Kështu u shënua Viti i Ri 2022 në disa vende të Evropës

E shtunë, 1 Janar 2022 - 16:30 albinfo.ch

Shtetet e botës shënuan ardhjen e vitit 2022. Festimet u zhvilluan në Evropë, ku me gjithë motin jashtëzakonisht të butë, shumë festa të mëdha dhe shfaqje fishekzjarrësh u anuluan, për shembull, në Londër dhe Paris, ose u zvogëluan, si në Madrid.

Thuhet se në Berlin nuk pati asnjë shfaqje të madhe fishekzjarrësh në Portën e Brandenburgut dhe asnjë festë me qindra-mijëra njerëz.

Nërkohë në Romë, policia italiane mbylli disa zona në qendër të qytetit pasi, fishekzjarrët u hodhën mbi kalimtarët pranë stacionit të metrosë Colosseum, njoftoi agjencia e lajmeve ANSA, duke shtuar se fillimisht nuk u raportua për të lënduar.

Franca e priti vitin me masa të rrepta Covid-19. Fishekzjarrët tradicionale të Vitit të Ri në Harkun e Triumfit në Paris u anuluan, ndërsa dollija me verë në Champs-Élysées nuk u lejua.

Në Paris dhe në shumë pjesë të vendit, alkooli u ndalua në rrugë rreth fundit të vitit.

Megjithatë, një turmë e madhe u mblodh në Champs-Élysées. Vetëm disa fishekzjarrësh shpërthyen në qiellin e Parisit pasi shitja e tyre ishte e ndaluar pothuajse kudo në Francë para natës së Vitit të Ri.

Në një numër zonash, përfshirë Parisin, baret dhe restorantet duhej të mbylleshin në orën 2 të mëngjesit (0100 GMT) të shtunën.

Në Strasburg dhe zonën përreth, autoritetet vendosën një shtetrrethimi për personat e pashoqëruar nën moshën 16 vjeç për shkak të problemeve serioze në të kaluarën.

Ministri i Brendshëm Gérald Darmanin tha se më shumë se 95,000 oficerë policie dhe xhandarë u mobilizuan në natën e Vitit të Ri për të siguruar respektimin e rregullave.

Pavarësisht rritjes së shpejtë të numrit të infeksioneve me koronavirus, festa masive më tradicionale e Vitit të Ri në Spanjë u zhvillua sërish në Madrid pasi u anulua vitin e kaluar, përcjell Telegrafi.

Rreth 7,000 njerëz e mirëpritën vitin e ri në sheshin Puerta del Sol të Madridit, ndonëse numri i pjesëmarrësve të lejuar u reduktua me rreth 60 për qind.

Ndryshe në kryeqytetin spanjoll nuk kishte kufizime të rëndësishme.

Në anën tjetër, miliona njerëz në Moskë festuan Vitin e Ri në temperatura të ulëta me fishekzjarrë në disa vende dhe pa kufizime të mëdha për koronavirusin.