Koronavirusi: çast pas çasti

Kompania amerikane nis testimin në njerëz të vaksinës kundër Covid-19

Novavax është kompania amerikane, e cila ka filluar testimin në njerëz të vaksinës kundër koronavirusit.

Sipas studimit të stafit mjekësor, pritet që rezultatet e para lidhur me sigurinë dhe efektin e kësaj vaksine të dalin gjatë muajit korrik.

Novavax tha se faza e parë e testimit klinik ka nisur në 130 pjesëmarrës të shëndetshëm, të moshës 18 deri në 59 vjeç, në Australi.

Faza e dytë pritet të zhvillohet në disa vende, përfshirë Shtetet e Bashkuara, dhe të vlerësojë imunitetin, sigurinë dhe reagimim e sëmunjdes që e shkakton koronavirusi, COVID-19, në një gamë më të gjerë të moshave.

Dhjetëra vaksina tashmë janë në fazat e hershme të testimit, sidomos në SHBA, Evropë dhe Kinë.

Është ende e paqartë nëse ndonjëra prej tyre do të funksionojë kundër koronavirusit, i cili ka infektuar afro 5.5 milionë njerëz në gjithë botën dhe ka vrarë mbi 346,000, përcjell Albinfo.ch.