Kosova, ende vendi i vetëm i izoluar

Kosova vazhdon të mbetet vendi i vetëm në Ballkanin Perëndimor që qytetarët e saj ende kanë nevojë për viza për të udhëtuar në vendet e Bashkimit Evropian. Kosova është në pritje për heqje të vizave që nga viti 2008.

Në vitin 2008 ka nisur dialogu për liberalizimin e vizave me pesë shtetet e Ballkanit Perëndimor, por jo edhe me Kosovën. Radio Evropa e Lirë ka publikuar një informacion të detajuar, ku shihet rrugëtimi në këtë proces.

Komisioni Evropian kishte dorëzuar udhërrëfyesin për liberalizimin e vizave për Shqipërinë, Serbinë, Maqedoninë e Veriut, Malin e Zi dhe Bosnjën e Hercegovinën. Udhërrëfyesi nuk i ishte dorëzur Kosovës.

Pas një viti, pra në vitin 2009, Komisioni Evropian rekomandoi liberalizimin e vizave për qytetarët e e Serbisë, Malit të Zi dhe Maqedonisë së Veriut.

Shqipëria dhe Bosnjë e Hercegovina s’kishin marrë rekomandimin, meqë konsiderohej se nuk i kishin përmbushur kriteret. Kosova, që nuk e kishte marrë udhërrëfyesin nga KE-ja, cilësohej si vend ku “kërkesat teknike për liberalizimin e vizave ende nuk janë përmbushur”.

Në dhjetor të 2009-ës, Serbia, Maqedonia e Veriut dhe Mali i Zi morën liberalizimin e vizave.

Për Shqipërinë e Bosnjë e Hercegovinën, vizat u hoqën në dhjetor të vitit 2010.

Pas dy vjetësh nga liberalizimi i vizave për këto shtete, Kosova mori udhërrëfyesin për liberalizimin e vizave. Numri i kritereve ishte dyfish më i lartë në krahasim me udhërrëfyesit për shtetet e tjera të rajonit.

“Të përpiqet të ta përfundojë, në mënyrë të koordinuar me palën tjetër, përcaktimin e kufirit/pikës kufitare me Malin e Zi”, është një nga kriteret për Kosovën në udhërrëfyes.

Në maj të 2016-ës, Komisioni Evropian kërkoi nga Kosova që ta ratifikojë Marrëveshjen për demarkacionin e kufirit me Malin e Zi para se të rekomandojë liberalizimin e vizave.