Kosova shkëlqen në Pragë: Orkestra “Amadeus” fiton Medaljen e Artë dhe katër çmime ndërkombëtare

Foto: Visar Kadrolli

Orkestra e Fëmijëve dhe të Rinjve “Amadeus” nga Kosova ka arritur një sukses të rëndësishëm në festivalin ndërkombëtar të orkestrave “Musica Orbis”, të mbajtur në Pragë të Çekisë, duke u vlerësuar me katër çmime.

Orkestra u shpërblye me Çmimin e Parë dhe Medaljen e Artë (Gold Medal), ndërsa mori edhe tri vlerësime të tjera të rëndësishme. Violinisti Elton Syla, koncertmjeshtër i orkestrës, u nderua me çmimin special si violinist solist, ndërsa Princ Fanaj u shpall violinisti më entuziast nga grupi i violinave të para. Po ashtu, Orkestra “Amadeus” fitoi edhe Çmimin e Publikut, duke marrë vlerësimin e adhuruesve të festivalit, transmeton albinfo.ch.

Ky sukses përfaqëson një tjetër dëshmi të talentit dhe përkushtimit të të rinjve muzikantë nga Kosova, të cilët po prezantojnë vendin me dinjitet në skenën ndërkombëtare.

Merita për këtë arritje i atribuohet edhe stafit drejtues dhe pedagogjik të shkollës “Amadeus”, me dirigjentin Vehbi Shosholli, drejtoreshën Hana Petrovci, zëvendësdrejtoreshën Vanesa Petrovci Shabani, koordinatoren Arta Rexhepi dhe gjithë ekipin që ka kontribuar në përgatitjen e orkestrës.

Me këtë rezultat, Orkestra “Amadeus” vazhdon të promovojë vlerat artistike të Kosovës dhe të sjellë suksese në arenën ndërkombëtare.