Lajme

Kosovarët japin miliona për vizën Schengen

Vendi që kanë përfituar më së shumti nga vizat, sipas GAP, është Zvicra me 2.7 milionë, pastaj vjen Gjermania me 2.4 milionë dhe vendet si Italia me 1.7 milion etj.

E mërkurë, 8 Maj 2013 - 16:57 albinfo.ch
Vetëm brenda tri viteve të fundit rreth 217 mijë kosovarë kanë aplikuar për viza schengen dhe kanë shpenzuar rreth 14 milionë euro për pagesa në ambasada të ndryshme. Këtë e bëri të ditur Agron Demi, drejtor nga Institutit “GAP”, në një konferencë për media mbajtur të mërkurën në Prishtinë.
 
“Për tre vjet 2010-2012, mbi 217 mijë kosovarë kanë aplikuar për viza. Vetëm kosto direkte në ambasada, për tre vjetët është mbi 9 milionë euro. Kur kësaj i shtohet edhe kostoja tjetër prej mbi 5.8 milionë euro që shkon për përgatitje të dokumenteve, atëherë del se kosovarët kanë shpenzuar mbi 15 milionë euro për viza”, tha Demi.
 
Kosova, sipas tij, është vendi i vetëm në regjionin e Ballkanit Perëndimor ndaj të cilit Bashkimi Evropian (BE) aplikon regjimin e vizave. Në anën tjetër, Kosova sipas Demit, është vendi më i varfër dhe me shkallën më të lartë të papunësisë në Evropë.
 
“Përkundër kësaj, kosovarët shpenzojnë më së shumti në Evropë për të aplikuar për viza. Për tri vite, 217.862 kosovarë kanë aplikuar për vizë “Shengen”: 82.405 në vitin 2010, 67.901 në vitin 2011 dhe 67.556 në vitin 2012. Mbi 17 për qind e aplikantëve për viza refuzohen nga shtetet e zonës Shengen”, konsideron ai.
 
Nëse shkohet sipas parametrave të tri viteve të kaluara, atëherë sipas Demit, mund të pritet se edhe në vitin 2013 më shumë se 65.000 kosovarë do të aplikojnë për viza me një kosto shtesë së paku edhe për 4.5 milion euro.
 
Vendi që kanë përfituar më së shumti, sipas tij, është Zvicra me 2.7 milionë, pastaj vjen Gjermania me 2.4 milionë dhe vendet si Italia me 1.7 milion etj.
 
Ndryshe aplikimi dhe marrja e një vize është sakrificë në vete. Radio Evropa e Lirë sjell rrëfimin e disa qytetarëve që kanë aplikuar për viza. Ata përshkruajnë sakrificën që e bëjnë për t’i përmbushur disa dokumente, me dhjetëra, për të marrë një vizë
 
Bujar Mavriqi është njëri nga aplikuesit për vizë. Ai tha se kohët e fundit ka aplikuar tri herë për vizë Shengen, derisa dy herë ka arritur ta marrë vizën e një herë është refuzuar.
 
“Unë, tri herë kam aplikuar për vizë, dy herë kam arritur ta marr vizën, një herë jo. Vizën e kam pasur Shengen dhe e kam pasur të drejtën të udhëtoj në të gjitha vendet e Bashkimit Evropian. Ambasada e Gjermanisë më ka refuzuar, pa m’u dhënë ndonjë arsye. Dhe, të hollat që i kam paguar, 35 euro, nuk më janë kthyer”, u shpreh Mavriqi.
 
Edhe Ardiana Ahmeti tregoi një përvojë të ngjashme: “Unë kam aplikuar në Ambasadën e Amerikës dhe më kanë refuzuar dy herë. Kam paguar 100 dollarë, madje edhe kur të refuzon, nuk t’i kthen ambasada paratë”, tha ajo.
 
Ndërsa, Fisnik Korenica nga Grupi për Studime Juridike dhe Politike theksoi se Qeveria e Kosovës dhe mekanizmat tjerë institucionalë duhet të angazhohen më shumë për përmbushjen e kritereve për liberalizim të vizave, që dalin nga Komisioni Evropian.
 
“Viti 2013 fillimisht ka qenë i proklamuar nga Qeveria e Kosovës si vit i liberalizimit të vizave dhe ky vit nuk do të jetë ai viti i liberalizimit. Andaj, Kosova edhe më tej do të mbetet si vendi më i izoluar në Evropë sa i përket qarkullimit të lirë në zonën Shengen”, tha Korencia.

 Të tjera nga Lajme

Nga suksesi në Hamallaj drejt Valamar Tale

 E-Diaspora

 Jeta në Zvicër