Kosovë: Dështon rezoluta që synonte pamundësimin e shtrenjtimit të rrymës

Kuvendi i Kosovës ka dështuar të miratojë draft-rezolutën e propozuar nga opozita kundër rritjes së çmimit të rrymës, njofton Albinfo.ch.

Shkak në dështimin e kësaj rezolute ishte mungesa e kuorumit, duke qenë se në momentin kur u hodh në votim ishin vetëm 45 deputetë.

Përmes këtij mocioni, opozita synonte t’i kërkojë Qeverisë të refuzojë propozimin aktual të Zyrës së Rregullatorit të Energjisë lidhur me tarifat e reja të energjisë elektrike.

“Çdo propozim eventual për rritje të tarifave të shoqërohet me normë të reduktuar të TVSH-së në zero, të ndiqen modelet e shtete evropiane që kanë praktikuar një model të tillë, të ofrohet sa më parë alternativa afatgjate me energji të qëndrueshme dhe të përballueshme. Në këtë drejtim të ndërpriten vonesat e paarsyeshme dhe të dëmshme të qeverisë në lidhje me gazifikimin e Kosovës, një projekt që shtetet e rajonit e kanë nisur tashmë. Qeveria duhet të përshpejtojë për dhënien e lejeve për nisjen masive të investimeve drejt sektorit të energjisë solare. Kuvendi i Kosovës obligon Qeverinë që në afat prej 15 ditësh të sjellë dhe të prezantojë në Kuvend një raport me shkrim për moszbatimin e pikës pesë të vendimit të Kuvendit të datës 06.05.2021 për mossigurimin në procesin e futjes në sistem të faturave sipas ligjit në fuqi te konsumatorët në komunat përkatëse në veri të Kosovës”, thuhej mes tjerash në rezolutë.

LAJME INTERESANTE NGA INTERNETI