Kosovë-Maqedoni, së shpejti vetëm me letërnjoftime

Kufiri Maqedoni-Kosovë së shpejti pritet të kalohet vetëm me letërnjoftime, pa pasur nevojë për pasaporta. Marrëveshje ndërmjet dy shteteve pret ratifikimet

Qytetarët e Maqedonisë dhe ata të Kosovës shumë shpejt do të lëviznin nëpër këto shtete vetëm me letërnjoftime biometrike. Marrëveshje ndërshtetërore për lëvizjen e lirë vetëm me letërnjoftim është duke shkuar drejt finalizimit dhe shumë shpejt do të fillojë të aplikohet, ka thënë zëdhënësi i Qeverisë së Maqedonase, Muhamet Hoxha.

Hoxha për TV21, konfirmon se Qeveria ka kaluar tekstin e marrëveshjes në Kuvendin e Maqedonisë dhe të dy qeveritë, në Shkup dhe Tiranë, kanë obliguar Ministrat e Punëve të Jashtme që ta nënshkruajnë atë.

Pas nënshkrimit pritet edhe ratifikimi në kuvend, ka thënë ai. Sipas Hoxhës, duke u nisur nga e drejta ndërkombëtare dhe marrëdhëniet miqësore, me këtë marrëveshje shtetasit e njërit apo shtet tjetër, mund të hyjnë në territorin përkatës me letërnjoftime biometrike, në të gjitha vend-kalimet kufitare.

Ndryshe, çështja e kalimit ndërshtetëror vetëm me letërnjoftime është diskutuar në fillim të vitit të kaluar nga ish-ministri i Brendshëm i Kosovës, Bajram Rexhepi dhe ish-ministrja maqedonase e Punëve të Brendshme, Gordana Jankullovska. Derisa atëbotë ishte nënshkruar një marrëveshje, tani duket se kjo do të realizohet.