DE Balkani

Kosovë: Vdes 70-vjeçari nga COVID-19, vajza e tij thotë se mbeti pa oksigjen

Edhe një person i infektuar me COVID-19 ka vdekur sot në Klinikën Infektive të QKUK në Prishtinë. Viktima është një 70-vjeçar nga Mitrovica.

Rastin e ka konfirmuar vajza e viktimës, Arbnora Fazliu – Rama, e cila thotë se babai i saj ka vdekur sot në orën 03:00 të mëngjesit.

Ajo po ashtu ka ngritur akuza ndaj mjekëve të Klinikës Infektive. Dyshimet e saj janë që babai ka mbetur pa oksigjen, shkruan albinfo.ch.

“Unë po dyshoj që gazin nuk e kanë pas siç duhet, mbikëqyrja nuk u kanë siç duhet… Parmbrëmë u kanë shumë mirë. Mbrëmë më ka thirr vëllau në orën 3 të mëngjesit edhe më ka thanë që ka vdekë”.

Ajo shton se nuk ka marrë asnjë përgjigje nga mjekët për rrethanat të cilat e ka vdekur i ati.

“Mu kjo po më çudit, kërkush përgjegjësi të madhe nuk ka marrë. Tash dul mjekja kryesore edhe tha që nuk jam e informume për rastin dhe shkoi nalt, nuk e pashë më. I tha vëllaut në ora 11 me ardh me marrë kufomën, por tash po vijnë me marr me ia bo obduksionin”, rrëfeu ajo.

Arbënora thotë se babi i saj, edhe pse në moshë, nuk kishte sëmundje të tjera shoqëruese.

“Baba jem u kanë 70 vjeçar, u kanë mirë me shëndet, nuk ka pas probleme kurgjo tjetër”.

Në Kosovë, brenda 24 orëve ka shkuar në 12 numri i personave të vdekur nga COVID-19.