KQZ-ja me rregulla shtesë për votuesit nga diaspora

Për rivotim në komunën e Istogut, që do të mbahet më 17 dhjetor, Komisioni Qendror i Zgjedhjeve, nëpërmjet një komunikate për media, ka bërë të ditur se votuesit e regjistruar për votim përmes postës duhet të dërgojnë dëshmi zyrtare shtesë për adresën e vendbanimit jashtë Kosovës dhe numrin e telefonit kontaktues.

Sipas KQZ-së, më pas këta votues do të kontaktohen për verifikim. Këta hapa KQZ-ja i ka marrë pas dyshimeve për mashtrime me votat e personave që jetojnë jashtë Kosovës, përcjell albinfo.ch.

Sipas KQZ-së, në rast se këta votues, që janë regjistruar suksesshëm për Komunën e Istogut, nuk do të sjellin dëshmi zyrtare shtesë për adresën dhe numrin kontaktues të telefonit nga deri më 6 dhjetor 2017, do të kthehen si votues në Listën Votuese brenda Kosovës, në Qendrat e Votimit sipas adresave të tyre në Regjistrin Qendror Civil.