KQZ kërkon para për zgjedhje

Komisioni Qendror i Zgjedhjeve nuk e ka asnjë cent për organizimin e tyre

Data e zgjedhje të parakohshme është caktuar me 6 tetor. Por, Komisioni Qendror i Zgjedhjeve nuk e ka asnjë cent për organizimin e tyre. Ky mekanizëm po kërkon pesë milion e 700 mijë euro për të organizuar si duhet procesin zgjedhor.

Në KQZ nuk kanë ndenjur duarkryq sa i përket sigurimit të fondeve. Kryetarja Valdete Daka, tashmë u është drejtuar me një shkresë zyrtare Presidencës dhe Qeverisë.

‘’Të gjitha procedurat nvaren nga buxheti, pa materiale zgjedhore ne nuk mund të organizojmë zgjedhjet..’’

Daka shton se nuk marrin përgjegjësi nëse procesi komplikohet, për shkak të vonesave.

‘‘Ne presim, që Qeveria sa ma parë të ndajë dhe të alokojë buxhetin.Në të kundërtën ne nuk mund të bartim përgjegjësi për çfarëdo lloj vonese apo çfarëdo lloj komplikimi’.

E nga ministria e Financave, në një përgjigje me shkrim për T7, kanë thënë se  të gjitha paratë e nevojshme për organizimin e zgjedhjeve ekzistojnë. Por që nuk mund të barten pa sqarimet juridike. Ministria e Financave ka mjetet të mjaftueshme në dispozicion dhe do ta bartë të gjithë shumën e kërkuar KQZ-së për organizimin e zgjedhjeve.

Mjetet do të alokohen në përputhje me dispozitat ligjore në fuqi posa të përfundojnë të gjitha procedurat ligjore. Ndërkohë, Gjykata Kushtetuese ende nuk ka vendosur në pyetjen e adresuar nga ish kryeministri Ramush Haradinaj, në lidhje me kompetencat e qeverisë së dorëhequr.

Kjo lëndë tashmë është proceduar nga Gjykata dhe aktualisht është në fazën e shqyrtimit. Për sa i përket afatit kohor për shqyrtimin e kësaj lënde, Gjykata nuk ka ndonjë afat të caktuar për vendimmarrje. Megjithatë, bazuar në praktikat e deritanishme me kërkesat institucionale që ngërthenin në vete situata më urgjente, koha minimale për vendimmarrjen e Gjykatës variron nga një muaj e gjysmë deri në dy muaj.

E vonesat e tilla rrezikojnë që aplikacionet më të rëndësishme të procesit zgjedhor, të mos përfundohen me kohë, thonë nga KDI. Legjislatura e VI’të e Kuvendit, u shpërnda me 22 gusht, me 89 vota pro, dy abstenime dhe një kundër Albinfo.ch.

---