Kryetari i LVV-së takohet me ambasadorin e Zvicrës në Kosovë

Kryetari i Lëzivjes Vetëvendosje, Albin Kurti zhvilloi sot një takim me ambasadorin e Zvicrës në Kosovë, z. Jean-Hubert Lebet.

Kurti gjatë takimit i prezantoi ambasadorit qëndrimet e Lëvizjes Vetëvendosje, mbi situatën e përgjithshme në Kosovë, dhe, veçanërisht mbi zhvillimet e fundit politike që kanë të bëjnë me dialogun me Serbinë, përcjell albinfo.ch

Në takim gjithashtu u bisedua edhe për gjendjen e rëndë ekonomike në vendin tonë dhe korrupsionin e lartë.

Kryetari Kurti e njoftoi ambasadorin Lebet me programin e Lëvizjes dhe propozimet për të dalur nga kjo krizë duke stimuluar zhvillimin ekonomik për krijimin e vendeve të punës si dhe për shtetin e së drejtës i cili e mban ligjin mbi politikën.

Gjithashtu ata kanë diskutuar edhe për rëndësinë e marrëdhënieve sa më të mira mes Kosovës dhe Zvicrës si dhe mundësitë për ta thelluar e zgjeruar bashkëpunimin në interes të ndërsjelltë të dy vendeve.

Në fund të këtij takimi të dyja palët u dakorduan për vazhdimin e komunikimit dhe të takimeve të rregullta.