Kurti për Blair: Kosova do ta kujtojë përherë dhe do të jetë mirënjohëse për përkushtimin për drejtësi dhe paqe

Foto FB: Albin Kurti

Në ditën e shënimit të 25-vjetorit të çlirimit të Kosovës, sot po qëndron për vizitë në Kosovë ish-kryeministri i Britanisë së Madhe, Tony Blair, ku ndër të tjera është pritur në takim nga kryeministri i Kosovës, Albin Kurti.

Sipas njoftimit nga Zyra e Kryeministrit, fillimisht, Kurti e falënderoi Mbretërinë e Bashkuar dhe Blair për ndihmën dhe kontributin në çlirimin e Kosovës, rolin e tij të rëndësishëm dhe mbështetjen e palëkundur gjatë luftës në Kosovë, e cila çoi në çlirimin e vendit nga pushtuesit serb dhe përkrahjen në etapat e shtetndërtimit të vendit tonë, transmeton albinfo.ch.

Tutje, sipas njoftimit, kryeministri shtoi se është i nderuar të mirëpresë Tony Blair sot, ndërsa tha se udhëheqja dhe vendosmëria e tij ishin vendimtare në mbledhjen e mbështetjes ndërkombëtare dhe për të siguruar që drejtësia dhe paqja të mbizotërojnë.

“Populli i Kosovës do ta kujtojë dhe do të jetë mirënjohës përherë për përkushtimin tuaj për drejtësi dhe paqe”, ka thënë ai në takim.

Ndër të tjera, në njoftim thuhet se ata kujtuan ngjarjet e rëndësishme që kulmuan me lirinë e Kosovës, duke diskutuar vendimet dhe veprimet kritike të marra gjatë ndërhyrjes së NATO-s në vitin 1999, të cilat ishin kyçe në përfundimin e luftës dhe sigurimin e paqes.