Kosova

Kurti vizitë në Bruksel, nuk takon Vuçiç-in

Është bërë e ditur se kryeministri i Kosovës Albin Kurti javën e ardhshme do të vizitojë Brukselin, e para vizitë në kryeqendrën evropiane prej momentit që ka marrë postin e kryeministrit për mandat të dytë, përcjell albinfo.ch.

Sipas kësaj, në këtë vizitë në Bruksel ai nuk do të takojë presidentin serb Aleksander Vuçiç, por vetëm përfaqësuesit e lartë të BE-së.

Kështu ka thënë për “TV Klan” zëdhënësi i qeverisë së Kosovës Përparim Kryeziu.

“Në mesin e javës së ardhshme, kryeministri Kurti do të qëndrojë në Bruksel, ku do të takohet me përfaqësues të lartë të BE-së ndërsa nuk do të ketë takim Kurti -Vuçiç”, është shprehur ai.

Kryeziu nuk dha detaje të tjera rreth kësaj vizite. Dialogu Prishtinë-Beograd kishte rinisur në kohën kur Avdullah Hoti ishte kryeministër, ndërsa ende nuk dihet se kur pritet të ndodh takimi i parë Kurti-Vuçiç.