Lideri i ri partisë së Merkelit, përkrahës i Kosovës

Laschet: "Konflikti i Kosovës nuk ka shpërthyer për shkak të natalitetit, por buron nga fjalimi i Millosheviqit në Fushë-Kosovë më 1989. Me atë fjalim ai e mbuloi Ballkanin me luftë e dëbime”

Sot (e shtunë), Armin Laschet është zgjedhur kryetar i ri i Partisë Konservatore Gjermane (CDU), partisë së kancelares Angela Merkel, transmeton albinfo.ch.

Politikani i shquar gjerman, veç tjerash është i njohur për qëndrimet e tij ndaj Kosovës. Laschet kishte kritikuar politikanin  tjetër gjerman, Sarrazin i cili kishte deklaruar se turqit po e pushtojnë Gjermaninë me natalitet të lartë “sikur shqiptarët Kosovën”.

“Historia e Kosovës është pak më e ndërlikuar. Kjo çfarë thotë Sarrazin, është mendësia e diktatorit Millosheviq, i cili kështu e ka arsyetuar politikën e tij agresive serbomadhe. Konflikti i Kosovës nuk ka shpërthyer për shkak të natalitetit, por buron nga fjalimi i Millosheviqit në Fushë-Kosovë më 1989. Me atë fjalim ai e mbuloi Ballkanin me luftë e dëbime”.

Po ashtu, Laschet e kishte mbrojtur ndërhyrjen e NATO-s në Kosovë.

“Në konfliktin e Kosovës Këshilli i Sigurimit i OKB-së nuk ka qenë i aftë për të marrë vendim dhe megjithatë është vepruar”, kishte thënë ai.

Laschet e ka dekoruar qytetarin Harald Meurer për themelimin e një organizate, e cila më 1999 ka tubuar para për viktimat e luftës në Kosovë. /Albinfo.ch

 

---