Ministri Gashi: Ligji i ri për diasporën së shpejti do të aprovohet

Ministri i Diasporës dhe i Investimeve Strategjike i Kosovës, Dardan Gashi, ka pritur një grup të mësuesve të shkollës shqipe nga Suedia, i kryesuar nga  Xhevat Isufi, Hava Limani dhe Fixhrie Syla. 

Në këtë takim, i cili përkonte me jubileun e 15-të të organizimit të ekskursioneve të diasporës në atdhe, Gashi u nderua me mirënjohje në emër të institucioneve arsimore, mësuesve, nxënësve dhe prindërve të komunës së Angelholmit në Suedi, përcjell albinfo.ch.

Në njoftimin për media thuhet se mësuesit e falënderuan Gashin për ndihmën e dhënë në shpërndarjen e librave për bibliotekat e vendeve ku mësohet shqip. 

Ministri Gashi i informoi ata  për Ligjin e ri të diasporës, i cili së shpejti pritet të aprovohet. Sipas ministrit Gashi, pas aprovimit të këtij ligji, do të institucionalizohet mësimi shqip në diasporë dhe do të zgjidhen shumë çështje që kanë të bëjnë me diasporën.