Lulzim Veliu largohet nga Bashkësia Shqiptare në Gjermani

Veliu ka thënë se disa individë po mundohen ta kthejnë në instrument në dorë të forcave të ndryshme politike dhe grupeve të ndryshme të interesit këtë shoqatë

Kryetari i Bashkësisë Shqiptare në Gjermani, Lulzim Veliu, përmes rrjetit social Facebook ka bërë të ditur se ka dhënë dorëheqje të parevokueshme nga pozita e tij si kryetar i kësaj shoqate. Veliu ka thënë se nuk e kishte menduar që do të tërhiqet kaq shpejt dhe në këtë mënyrë nga kjo iniciativë, të cilën thotë se e ka iniciuar para më shume se tre vjetëve.

“Si individ, por edhe si shoqatë investuam aq shumë kohë dhe mund që të funksionojë, me të vetmin qëllim që shqiptaret të mund të përfaqësohen më mirë dhe më drejt si para opinionit gjerman, por edhe para shteteve nga vijnë shqiptarët. Të gjitha këto mendova se i materializuam në dokumentet e ndryshme të BSHGJ-së dhe statutit të saj, i cili orienton për ruajtjen e pavarësisë së shoqatës nga çdo ndikim politik dhe grup interesi. Mirëpo, pikërisht parimet e dokumenteve kryesore të BSHGJ-së dhe statuti i saj, që në fillimet e para, ka tendenca të bastardohen dhe të përdhosen nga disa individë në Kryesinë e Bashkësisë”, ka shkruar ai.

Veliu ka thënë se disa individë po mundohen ta kthejnë në instrument në dorë të forcave të ndryshme politike dhe grupeve të ndryshme të interesit këtë shoqatë.