Më shumë se gjysma e shqiptarëve nuk kanë mundësi të bëjnë pushime

@pixabay

Shqipëria ka shënuar rritje të vizitorëve me mbi 10 milionë turistë vetëm vitin e kaluar. Por, ndërkohë, vetë shqiptarët nuk kanë mundësi të bëjnë pushime.

Sipas EUROSTAT-it, gjysma e shqiptarëve nuk bëjnë dot pushime dhe gati 70% e shqiptarëve nuk kanë mundësi financiare, raporton tch, përcjell Albinfo.ch.

“50%  të të ardhurave familjet shqiptare duhet t’i shpenzojnë për nevojat e domosdoshme dhe themelore që janë ushqimet, qiraja dhe faturat. 30% e përbëjnë dëshirat si pushimet, drekë jashtë me familjen e të tjerë, dhe 20% shkon për kursime. Por, në kushtet ku jemi, me këto paga ky raport është çrregulluar dhe kemi raportin 80 me 20%, pra harxhojmë vetëm për domosdoshmërinë dhe kursimet, nëse arrihet dot, pasi lidhet me pasigurinë për jetën. Nëse një shqiptar shkon jashtë shtetit vetëm për një natë e dy ditë, kostot shkojnë 300 euro minimum dhe kjo për pushime minimaliste që edhe pse shkon për pushim, ti kursen”, u shpreh eksperti i kontabilitetit, Edison Zaçaj.

Sipas tij, të rinjtë po emigrojnë për shkak të pamundësive financiare, moshave mesatare nuk iu dalin rrogat, ndërsa pensionistët mbahen me paratë e emigrantëve, që i ndihmojnë për të mbijetuar. Në këtë mënyrë, ai thotë se nuk u bie të mendojnë për pushime./Albinfo.ch