Merkel: Zemra ime rrah për këtë rajon

Merkel: "Mbështes nismën për bashkëpunim rajonal"

Kancelarja gjermane, Angela Merkel, sot u takua me krerët e Shqipërisë, Kosovës dhe Maqedonisë së Veriut. Ajo në konferencën për media me kryeministrin e Shqipërisë, Edi Rama, deklaroi se mbështet nismën për bashkëpunim rajonal, transmeton albinfo.ch.

Në lidhje me takimet e udhëheqësit e rajonit, Merkel tha se shumëçka ka ndryshuar në raportet mes vendeve të Ballkanit Perëndimor.

“Jam e bindur që në këndvështrimin gjeo-strategjik, Gjermania e Bashkimi Evropian ka një interes të vetin në anëtarësimin në BE, por sigurisht është diçka tjetër procesi i bashkëpunimit në nivel rajonal, një ide që është pranuar nga BE-ja apo këndvështrimi gjerman. Nëse ju takoheni, është e drejta juaj dhe unë këtë e përshëndes shprehimisht dhe shpresoj shumë që të vijoni në këtë drejtim. Zemra ime rrah për këtë rajon. Unë përshëndes dhe projektin e Tregut të Përbashkët Rajonal me katër marrëveshjet. Jo të gjithë janë duke bashkëpunuar, disa janë brenda zbatimit, disa janë duke u menduar t’i bashkohen, por sa më shumë të bashkoheni, aq më i fuqishëm do të jetë Procesi i Berlinit”, tha Merkel.

Po ashtu, ajo ka nxitur për më shumë bashkëpunim rajonal, duke thënë se këtë do ta përsërisë edhe në takimet bilaterale.

Ndërsa Rama ka thënë se kancelarja Merkel është mike e shqiptarëve dhe se Procesi i Berlinit, i nisura nga ajo, është një projekt largpamës.

Tema e vizitë së kancelares Merkel në Tiranë është bashkëpunimi rajonal dhe kryesisht jetësimi i Tregut të Përbashkët Rajonal, nismë kjo në kuadër të Procesit të Berlinit.

 

---