Mesazhi i Xhakës për largimin e Petkoviqit

Mesfushori shqiptar, Granit Xhaka, ka postuar një shkrim emocionues për largimin e Vladimir Petkoviq nga Zvicra

Vladimir Petkoviq ka vendosur të largohet nga Përfaqësuesja zvicerane, duke marrë drejtimin e skuadrës franceze, Bordeaux, shkruan albinfo.ch.

Ylli shqiptar, Granit Xhaka, iu ka drejtuar me një mesazh mjaft emocionues.

“Çfarë udhëtimi. Zotëri, dua thjesht të të falënderoj për gjithçka. Ne e shkruam historinë së bashku! Ka qenë një rrugëtim i jashtëzakonshëm. Faleminderit për punën tuaj të zellshme, për përkrahjen dhe për mënyrën sesi e ke shndërruar një ekip kombëtar në një grup vëllezërish. Ne nuk e harrojmë punën tuaj dhe t’i urojmë të gjithë të mirat në Bordeaux”, ka shkruar Xhaka në rrjetet sociale.

Ndërkohë, Petkoviq u shpreh pas largimit: “Kalova shtatë vjet të mrekullueshme te Zvicra, të cilat nuk do t’i harroj kurrë. Gjithashtu do të doja të falënderoja të gjithë ata që më mbështetën dhe më shoqëruan gjatë kësaj periudhe, duke bërë të mundur sukseset që kemi arritur”, theksoi tashmë trajneri i Bordeaux.

---