Lajme

Mijëra veta protestojnë në Bernë kundër shkurtimit të pensioneve

"Jo reformë të AHV-së në kurriz të grave" ishte një ndër thirrjet që bënë sot demonstruesit në Bernë. Organizatorët flkasin për 15.000 pjesëmarrës

“15,000 njerëz protestuan sot në Bundesplatz, në Bernë, kundër shkurtimit të pensioneve”, shkruan Federata Zvicerane e Sindikatave, raporton srf.ch.

“Hendeku i pensioneve të grave në raport me pensionet e burrave është shumë i madh, sa një e treta – Kjo është një skandal!”, thuhet veç tjerash në mesazhet e demonstruesve.

Më tutje, demonstruesit kanë bërë të ditur se do të rezistojnë ndaj projektligjit të reformës “AHV 21”, transmeton albinfo.ch. Ata i kanë kërkuar parlamentit të rrisë pensionet në vend që t’i zvogëlojë ato.

Një aleancë e përbërë nga sindikatat, kolektivet e grave dhe partive të krahut të majtë kishte bërë thirrjen për demonstrim. Sindikata Unia kishte organizuar transportin falas për në Bernë. Demonstruesit u mblodhën në Schützenmatte në orën 13.30 pasdite dhe më pas filluan marshimin e tyre protestues drejt Bundeshaus-it (Pallatit Federal).

Që nga ora 15 pasdite ata kanë qenë në Bundesplatz, ku ka pasur grumbullime njerëzish dhe koncerte.

Federata Zvicerane e Sindikatave ka mbledhur 137,777 nënshkrime për nismën “Për një pension të 13 -të AHV”, transmeton albinfo.ch. Votimi pritet të mbahet në vitin 2023.

Me reformën e planikuar të AHV, mosha e pensionit për gratë do të rritet nga 64 në 65 vjet dhe norma standarde për TVSH -në nga 7.7 në 8.1 për qind. Dhoma Nacionale e Parlamentit dëshiron të përdorë fitimet e Bankës Kombëtare nga normat negative të interesit për financime shtesë për AHV ndërsa Dhoma e Kantoneve (Senati) nuk e miraton këtë.

Për më tepër, politikanë të rinj të ndryshëm duan të lidhin moshën e pensionimit me jetëgjatësinë. “Jungfreisinnigen Schweiz” (të rinjtë e FDP-së) ka paraqitur 145,000 nënshkrime në gusht për një iniciativë e cila kërkon ngritjen e moshës së pensionimit në 66  vjeç, duke filluar nga viti 2032, përcjell albinfo.ch. Pas vitit 2032 mosha e pensionimit do të lidhej në përputhje me jetëgjatësinë e popullatës.

Nisma zhvillohet nën titullin “Për një sigurim të qëndrueshëm dhe të sigurt të pleqërisë (nisma e pensioneve)”.