Ministri Makolli është takuar me ambasadorin gjerman, Ernst Reichel

Ministri i Diasporës, Ibrahim Makolli, ka takuar Ambasadorin e Republikës Federale të Gjermanisë në Prishtinë, Ernst Reichel, me të cilin ka biseduar për mundësinë e bashkëpunimit në fushat që kanë të bëjnë me mërgatën kosovare në Gjermani.

Ministri Makolli e njoftoi ambasadorin gjerman me prioritet e MeD-së, duke potencuar këtu ndërtimin dhe zhvillimin e politikave që kanë të bëjnë me ruajtjen e identitetit kombëtar të mërgimtarëve në vendet ku ata jetojnë.

“Ruajtja e identitetit kombëtar është interes edhe i vendeve ku jetojnë mërgimtarët, pasi ata pasurojnë diversitetin kulturor të asaj shoqërie. Ne po ashtu jemi shumë të interesuar që diaspora jonë të jetë e integruar mirë në vendet ku jeton”, ka theksuar ministri Makolli.

Makolli po ashtu ka thënë se, ministria do të hartojë politika në përkrahje të investimeve të mërgimtarëve në Kosovë, pasi që sipas tij, hapja e bizneseve të mërgimtarëve jo vetëm që zhvillon ekonominë, por me hapjen e vendeve  të reja të punës parandalon përpjekjet e shumë të rinjve për të ikur ilegalisht nga vendlindja.

Ministri i Diasporës, Ibrahim Makolli, ka deklaruar gjithashtu se mos përfshirja e Kosovës në procesin e liberalizimit është një padrejtësi që po u bëhet qytetarëve të Kosovës dhe familjarëve të tyre në diasporë në pamundësi të lëvizjes së lirë të tyre dhe kësisoj forcimit të lidhjeve familjare.

Kurse, ambasadori i Republikës Federale të Gjermanisë, Ernst Reichel, ka thënë se Ministria e Diasporës përbënë një dikaster të rëndësishëm të bashkëpunimit ndërshtetëror mes Gjermanisë dhe Kosovës, duke theksuar se diaspora përbën një ndër elementet vendimtare për marrëdhëniet mes popujve.

Ai ka ofruar bashkëpunimin e ambasadës gjermane në projektet që kanë te bëjnë me diasporën kosovare në Gjermani.