Mustafa kryeministër, Murati ministër i Diasporës

Mustafa dhe kabineti i ri qeveritar, morën 73 vota nga 120 sa ka Kuvendi i Kosovës. Valon Murati emërohet ministër i Diasporës

Lideri i LDK-së, Isa Mustafa është zgjedhur të martën kryeministër i ri i Kosovës, me premtimin e zhvillimit ekonomik dhe zbutjen e papunësisë. Mustafa dhe kabineti i ri qeveritar, morën 73 vota nga 120 sa ka Kuvendi i Kosovës, ndërsa kundër votuan 38 deputetë ndërsa 2 abstenuan.

E veçanta e këtij votimi ishte se kundër Mustafës votuan katër deputetë nga partia e tij, LDK të cilët e irrituan kryeministri e ri.

“Falënderoj për këtë besim për të gjithë ju që më votuat, ata që votuan kundër dhe abstenuan sepse është e drejtë e secilit që të votojnë. Natyrisht se kjo vlen për të gjithë ju, por jo edhe për deputetët e LDK-së”, tha Mustafa në fjalimin e tij të parë të mbajtur si kryeministër në Kuvend.

Kundër kabinetit qeveritar, votuan: Vjosa Osmani, Armend Gashi, Dorintuna Maloku dhe Fatmir Rexhepi, ndërsa deputetja Alma Lama abstenoi. Po ashtu kundër ishin edhe partitë e bllokut opozitar, AAK, Vetëvendosje dhe Nisma për Kosovën.

Qeveria e re përbëhet nga PDK që ka shumicën e ministrive, LDK, Lista Serbe dhe komunitetet tjera pakicë.

Kabineti Mustafa

Ndryshe, kabineti Mustafa do t’i ketë 20 ministra dhe tre zëvendës kryeministra;    

Hashim Thaçi është zëvendëskryeministër dhe ministër i Jashtëm; Kujtim Shala, zëvendëskryeministër dhe ministër i Kulturës; Branimir Stojanoviq,

zëvendëskryeministër; Mahri Jagxhillar, ministër i Administratës Publike; Lubomir Mariq, ministër i Pushtetit Lokal; Arsim Bajrami, ministër i Arsimit Shkencës dhe Teknologjisë; Valon Murati, ministër i Diasporës; Hajredin Kuçi, ministër i Drejtësisë

9. Abdullah Hoti, ministër i Financave; Blerand Stavileci, ministër i Zhvillimit Ekonomik; Bekim Çollaku, ministër i Integrimeve Evropiane; Haki Demolli, ministër i FSK-së; Aleksandër Jabllanoviq, ministër për Komunitete dhe Kthim; Ferid Agani, ministër i Mjedisit dhe Planifikimit Hapësinor; Arban Abrashi, ministër i Punës dhe Mirëqenies Sociale; Edita Tahiri, ministër pa Portofol; Rasim Demiri, ministër pa Portofol; Memli Krasniqi, ministër i Bujqësisë; Skender Hyseni, ministër i Punëve të Brendshme; Imet Rrahmani, ministër i Shëndetësisë dhe Hikmete Bajrami, ministre e Tregtisë dhe Industrisë.