Në 4 vjetorin e pavarësisë, Kosova me Ambasadë në Tiranë

Berisha: Dy ambasadat tona kanë mision të dyfishtë, forcimin e pozitës së vendeve tona në rajon por kanë dhe mision kombëtar

4 vjetori i pavarësisë së Kosovës finalizohet me inaugurimin e Ambasadës së Kosovës në Tiranë. Me prerjen e shiritit të dy kryeministrave të vendeve përkatëse, ka marë udhë hapja e Ambasadës, e pozicionuar në mes të asaj ruse dhe serbe.

Kryeministri Berisha e ka cilësuar si moment të rëndësishëm në marrëdhëniet vëllazërore, ndërsa ka shprehur bindjen se me punë të përbashkët do të realizojnë projekte të rëndësishme.　

“Është nder i madh që inauguruam hapjen e selisë së ambasadës së Kosovës. Është një moment shumë i rëndësishëm në marrëdhëniet vëllazërore. Dy ambasadat tona kanë mision të dyfishtë, forcimin e pozitës së vendeve tona në rajon por kanë dhe mision kombëtar. Jam i bindur se nën udhëzimet e qeverisë së Kosovës kjo ambasadë së bashku me atë shqiptare në Prishtinë do të luajnë rol të madh për vendet tona. Edhe prania e Thaçit në Tiranë në 4 vjetorin e pavarësisë ka një simbol të madh. Me punë të përbashkët do të realizojmë projekte të rëndësishme”, ka theksuar 　ai.　

Kurse Kryeministrin e Kosovës Hashim Thaçi kjo është shenjë e qartë se jemi një komb dhe dy shtete.　

“Është një moment jashtëzakonisht i rëndësishëm. Falënderoj qeverinë shqiptare dhe kryeministrin Berisha për këtë dhuratë në katër vjetorin e pavarësisë. Jemi një komb dhe dy shtete, dhe bashke do te jemi ne BE dhe NATO. Sot po shënojmë një datë historike, një progres të jashtëzakonshëm. I bëj të ditur zotit Berisha se në qendër të Prishtinës është zënë një truall i mirë ku do të ndërtohet ambasada e Shqipërisë”, ka thënë ai.

Në ceremoninë e zhvilluar merrnin pjesë personalitetet më të larta politike të Qeverisë shqiptare dhe asaj të Kosovës.