Kosova

Në kuvend nis puna për ligjin që mbron vlerat e UÇK-së

Në Komisionin për Arsim në Kuvendin e Kosovës ka nisur shqyrtimi i projektligjit për vlerat e luftës së Ushtrisë Çlirimtare të Kosovës, pas zhurmës së madhe që u bë me listat e veteranëve.

Megjithëse do të duhej të mbroheshin me ligj vlerat e UÇK-së, sipas opozitës me këtë projektligj nuk do të ndodhë një gjë e tillë.

Ata kanë pasur kritika të mëdha për projektligjin, megjithëse thanë se duhet bërë më shumë për mbrojtjen e vlerave të luftës së UÇK-së.

Deputetët thanë se kategoria e luftëtarëve të UÇK-së është pothuajse e shenjtë dhe duhet bërë një ligj adekuat për ta.

Kryetari i këtij komisioni, Ismajl Kurteshi, tha se ka pritur që me ligj do të ketë një institucion që i mbron vlerat e luftës. Iniciues i këtij projektligji, Fadil Beka, ka thënë se me anë të këtij projektligji nuk mbrohen individët, por mbrohet institucioni.

Ai ka thënë se gjatë luftës ka ekzistuar vetëm një formacion ushtarak, UÇK-ja, dhe tha se modeli i ligjit është kroat.

Driton Çaushi tha se rasti i listave të veteranëve shpërfaq më së miri gjendjen ose kategorinë e ushtarëve të UÇK-së.