Oficeri i FSK-së në SHBA nderohet me dy çmime në kursin e Ushtrisë Amerikane

Nëntoger Kushtrim Fazliu u vlerësua si oficeri ndërkombëtar me performancën më të lartë akademike dhe për aftësi të jashtëzakonshme fizike.

Nëntoger Kushtrim Fazliu, oficer i Forcës së Sigurisë së Kosovës (FSK), ka përfunduar me sukses Kursin e Inxhinierisë Ushtarake Engineer Basic Officer Leader Course (EBOLC), një nga programet profesionale të Ushtrisë së Shteteve të Bashkuara për zhvillimin e oficerëve të inxhinierisë ushtarake.

Gjatë këtij programi, pjesëmarrësit trajnohen në udhëheqje, planifikim dhe zbatim të operacioneve të inxhinierisë luftarake, ndërtimin e kapaciteteve mbështetëse dhe komandimin e njësive në mjedise komplekse operacionale.

Për shkak të rezultateve të shkëlqyera gjatë kursit, nënteger Fazliu është nderuar me dy çmime të rëndësishme: Distinguished Honor Graduate, si oficeri ndërkombëtar me performancën më të lartë akademike, dhe Iron Man Award, për performancën e lartë fizike.

Ky vlerësim konsiderohet një sukses i rëndësishëm për oficerin e FSK-së dhe një dëshmi e nivelit të profesionalizmit të pjesëtarëve të Forcës së Sigurisë së Kosovës në programet ndërkombëtare ushtarake.

---