Pesë takime të dështuara për dinarin në Bruksel, paralajmërohet i gjashti

Në Bruksel gjatë ditës së djeshme ka përfunduar pa marrëveshje edhe një rund i bisedimeve mes Kosovës e Serbisë në nivel kryenegociatorësh. Ashtu si edhe gjatë takimeve të mëparshme, ku nuk ka pasur marrëveshje, temë kryesore e takimit ishte çështja e dinarit, përcjell albinfo.ch.

Takimi i pestë ndërmjet palëve, e që zgjati më shumë se shtatë orë, përfundoi pa ndonjë rezultat konkret, teksa u paralajmërua edhe një takim tjetër në javën e dytë të majit, i gjashti me radhë.

Siç kanë paralajmëruar të dy kryenegociatorët, Kosova dhe Serbia do të paraqesin komentet e tyre për propozimin e ri në ditët në vijim, ndërsa takimi i radhës për të njëjtën çështje do të mbahet në mes të majit.

Kryenegociatori i Kosovës, Besnik Bislimi, tha se ndërmjetësi i BE-së në dialog, Miroslav Lajçak, ka dalë me një propozim të ri për gjetjen e një zgjidhjeje për çështjen e pagesave.

“Ne kemi marrë përkushtimin tonë që në një periudhë prej një javësh të dërgojmë sugjerimet apo brengat tona për propozimin e fundit”, tha Bislimi, duke nënvizuar se gjatë takimit zyrtarët serbë kanë dhënë deklarata, sipas tij, shqetësuese lidhur me atë se si e shohin funksionimin e Asociacionit të komunave me shumicë serbe.

“Qëndrimi i palës serbe është që të gjitha strukturat ilegale të Serbisë duhet të financohen, të vazhdojnë të financohen deri në kohën kur të krijohet Asociacioni [i komunave me shumicë serbe], sepse sipas mendimit të tyre, qëllimi i Asociacionit nuk është që të sigurojë koordinim të mirë mes komunave, por të sigurojë legjitimizmin e pranisë së institucioneve serbe në Kosovë, që do t’i bënte ato institucione gjysmëserbe, por jo institucione të serbëve në Kosovë”, tha Bislimi.

E kryenegociatori i Serbisë, Petar Petkoviq, tha se pala prishtinase nuk dëshiron të negociojë, por dëshiron t’i shohë gjërat vetëm nga këndvështrimi i saj.

Ndërkaq, i dërguari i Bashkimit Evropian për bisedimet, Miroslav Lajçak, tha se u ka paraqitur palëve një dokument kompromisi në një përpjekje për të tejkaluar dallimet.

“Prita një takim nga Dialogu për të gjetur një zgjidhje për “çështjen e dinarit”. Ky takim u dha hapësirë të mjaftueshme palëve për të shpjeguar qëndrimet e tyre”, ka shkruar ai.

Lajçaku tha se në fund të takimit ka propozuar një dokument që synon të përafrojë qëndrimet e palëve sa i përket “çështjes së dinarit”.

“Takimi përfundoi duke paraqitur një dokument kompromisi në një përpjekje për të kapërcyer dallimet. Do të presë takimin e radhës pasi të pranojë së komentet konstruktive”.

Për dallim nga takimet e mëparshme, i dërguari i posaçëm i Bashkimit Evropian, Mirosllav Lajçak, të enjten nuk mbajti fillimisht takime të ndara me Bislimin dhe Petkoviqin, duke u futur drejtpërdrejt në takim trepalësh.

Me rregulloren e re të Bankës Qendrore të Kosovës (BQK), euroja u caktua si valuta e vetme në Kosovë për kryerjen e pagesave me para të gatshme nga 1 shkurti.

Bashkësia ndërkombëtare i ka kërkuar Kosovës ta pezullojë rregulloren, në mënyrë që t’u jepet kohë qytetarëve që të përshtaten me praktikën e re.

Por, Qeveria e Kosovës ka ngulur këmbë se fjala është për një vendim të pavarur të BQK-së e jo për vendim politik.

---