Lajme

Pilotët e avionëve të vegjël lirohen nga detyrimi për të komunikuar anglisht

Pilotët e avionëve pa motor të cilët aterrojnë në ndonjërin nga aeroportet regjionale të Zvicrës, do të lirohen nga detyrimi për të komunikuar në gjuhën angleze

Pilotët që e kanë fluturimin hobi po dhe pilotët në përgjithësi, tash e tutje në hapësirën ajrore të Zvicrës do të mund të komunikojnë përmes radiolidhjeve të tyre edhe në gjuhët vendore, shkruan srf.ch. Këtë vendim e ka marrë Dhoma Nacionale e Parlamentit të Zvicrës në seancën e mbajtur sot.

Me këtë vendim, pilotët e avionëve pa motor të cilët aterrojnë në ndonjërin nga aeroportet regjionale të Zvicrës, do të lirohen nga detyrimi për të komunikuar në gjuhën angleze.

Nga qershori i këtij viti, në Zvicër pati hyrë në fuqi detyrimi i komunikimit në gjuhën angleze për të gjithë pilotët, transmeton albinfo.ch. Ndërkaq, sipas shumicës së deputetëve në Dhomën Nacionale të Parlamentit të Zvicrës një detyrim i tillë ishte i tepruar dhe u shkaktonte probleme pilotëve amatorë.

Veç kësaj, në këtë sektor ka edhe ashtu përjashtime. Kështu, në Lugano, për shembull, për shkak të afërsisë me Italinë, hobi-pilotët komunikojnë edhe italisht mes vete.