Pritet të zhvillohet garë e fortë për Prishtinën

Për të parin e Prishtinës “lufta” më e fuqishme pritet të zhvillohet ndërmjet lëvizjes Vetëvendosje dhe Lidhjes Demokratike të Kosovës. LVV e ka kandidat Shpend Ahmetin, ndërsa LDK po mendohet mes tre emrave

Edhe pse kanë mbetur edhe disa muaj deri në mbajtjen e zgjedhjeve lokale në Kosovë, gara për kryeqytetin do të jetë më e fuqishme ndërmjet partive politike kosovare. Për të parin e Prishtinës “lufta” më e fuqishme pritet të zhvillohet ndërmjet lëvizjes Vetëvendosje dhe Lidhjes Demokratike të Kosovës.

Në opinion, tashmë kanë filluar të lakohen emrat e atyre që mund të jenë kandidat për të parin e Kryeqytetit.

E vetmja parti që deri më tash edhe zyrtarisht e ka caktuar kandidatin për kryetar të Prishtinës është Lëvizja Vetëvendosje, me kryetarin aktual Shpend Ahmetin.

Lidhja Demokratike e Kosovës, ende nuk është përcaktuar për kandidatin e saj, por gazeta Blic nga burime të saja ka marrë vesh se është një “luftë”e ashpër në lidhje me atë se kush do t’i dalë në “ballë” Shpend Ahmetit.

Deri më tani, si emra të mundshëm po përmenden ai i ish- kryetarit të Prishtinës, Ismet Beqiri, i ministrit aktual të Punës dhe të Mirëqenies Sociale, Arban Abrashi dhe i këshilltarit të Isa Mustafës, Sokol Havolli. “Këta janë emrat më serioz për t’u kandiduar për kryetar të Prishtinës, mirëpo deri më tani nuk ka asgjë konkrete në këtë drejtim”, tha ky burim.

Partia Demokratike e Kosovës e cila nuk e ka “top” priroritet Komunën e Prishtinës, gjithashtu i ka menduar tre emra si kandidatë për kryetar të kryeqytetit. Kandidati më serioz për kryetar të Prishtinës është Lirak Çelaj, i cili është edhe një kritikues i madh i qeverisjes aktuale në kryeqytet.

“Pos Çelajt, PDK dhe lideri i saj, Kadri Veseli si opsione shumë serioze i shohin edhe ministrin e Zhvillimit Ekonomik, Blerand Stavileci dhe ate të Bujqësisë, Memli Krasniqi”, tha ky burim.

As dy partitë tjera opozitare që tashmë kanë bërë koalicion parazgjedhor, AAK e Nisma nuk kanë vendosur se kush do të jenë kandidatët e tyre për kryetar të Prishtinës.

Emri i këshilltarit të Ramush Haradinajt, Avni Arifi shihet si më i mundshmi për t’u kandiduar nga ana e AAK-së për kryetar të Prishtinës.

Mirëpo, vetë Arifaj i kontaktuar nga Blic ka thënë se kjo parti ende nuk ka vendosur për këtë çështje. “Jo ende nuk e kemi zgjedhë. Besojë që gjatë muajit mars do ta zgjedhim”, tha Arifi. Mësohet se si emër i mundshëm nga AAK është edhe ai i nënkryetarit, Gazmend Abrashi.