Radovan Karaxhiç dënohet me 40 vjet burg

Gjykata e Hagës për Krime në ish-Jugosllavi dënoi me 40 vjet burgim ish liderin e serbëve të Bosnjës dhe Hercegovinës, Radovan Karaxhiq

Nën akuzat për krime lufte, gjenocid, persekutim, shfarosje, vrasje, dëbim e dhunim ndaj popullatës jo-serbe në Bosnjë dhe Hercegovinë gjatë viteve 1992-1995, Gjykata e Hagës për Krime në ish-Jugosllavi dënoi me 40 vjet burgim ish liderin e serbëve të Bosnjës dhe Hercegovinës, Radovan Karaxhiq.

Në lidhje me vendimin e kumtuar nga gjykata, Karaxhiç dhe prokuroria e Hagës kenë të drejtë ankese.

Aktakuza e Tribunalit të Hagës e ngarkonte Karaxhiqin për gjenocid, pjesëmarrje në gjenocid, likuidim, vrasje, dënime të paligjshme, deportim, akte çnjerëzore dhe krime të tjera të kryera kundër myslimanëve, kroatëve dhe civilëve të tjerë, popullatës jo-serbe në Bosnjë dhe Hercegovinë gjatë luftës në ish republikën jugosllave, transmeton zeri.info

Në dy pika është akuzuar për gjenocid, dhe nëntë akuza tjera për persekutim, shfarosje, vrasje, deportim, akte çnjerëzore, duke terrorizuar popullsinë civile, sulme të paligjshme mbi civilët dhe marrjen peng të ndërkombëtarëve.

Akuzat kundër Karaxhiç janë përmbledhur dhe janë përqendruar në spastrimin etnik në Bosnje dhe Hercegovinë në periudhën 1992-95; Fushata e terrorit kundër civilëve gjatë rrethimit të Sarajevës në të njëjtën kohë, duke marrë peng personelin e OKB-së në maj dhe qershor të vitit 1995 dhe gjenocidin në Srebrenicë në korrik të vitit 1995.

Këto krime, përveç gjenocidit, në pesë akuza janë të cilësuara si krime kundër njerëzimit dhe katër për shkelje të ligjeve dhe zakoneve të luftës.

Karaxhiç pas arratisjes shumëvjeçare ishte fshehur nën një identitet të rremë si, “Dr. Dabic”, dhe më pas u arrestua më 18 korrik 2008, dhe një javë më vonë nga Beogradi u ekstradua në Tribunalin e Hagës. Gjyqi ndaj tij filloi në tetor 2009 dhe përfundoi në vitin 2014.

Menjëherë pas verdiktit në Hagë, Qeveria e Serbisë, ka vendosur që të premten të diskutojë për ish liderin politik të serbëve në Bosnje dhe Hercegovinë, Radovan Karaxhiq. Sipas raportimeve bëhet e ditur që pika e vetme e rendit të ditës do të jetë vendimi i Tibunalit të Hagës.