Rama “fshesë” në Qeveri, ndërron katër ministra

I pari që u shkarkua ishte njeriu më besnik i kryeministrit Rama, Sajmir Tahiri, ministri i Brendshëm, ndërsa pas tij u larguan edhe tre ministra të tjerë ai i Shëndetësisë, Mirëqenies Sociale dhe Rinisë dhe  Pushtetit Vendor

Kryeministri i Shqipërisë, Edi Rama iu ka rënë “fshesë” katër ministrave të Kabinetit qeverisës, duke shkaktuar një “termet” në qeverinë Ram. I pari që u shkarkua ishte njeriu më besnik i kryeministrit, Sajmir Tahiri, Ministri i Brendshëm, ndërsa pas tij u larguan edhe ministri i Shëndetësisë, Ilir Beqja, ai  Mirëqenies Sociale dhe Rinisë, Blendi Klosi dhe ministri i Pushtetit Vendor dhe Koordinatorit Kombëtar për Antikorrupsionin, Bledi Çuci.

Shpjegimin zyrtar për largimin e ministrave e dha vetë kryeministri Rama, i cili në mënyrë të përsëritur në të kaluarën ka refuzuar çdo mundësi ndryshimesh në kabinetin e tij.

“Ndryshimet e qeverisë nuk reflektojnë asgjë tjetër, veçse domosdoshmërinë që udhëheqësit tanë politikë të fushatës së 18 Qershorit, të fokusohen me energji të reja dhe prani të vazhdueshme pranë njerëzve në përballimin e volumit të jashtëzakonshëm të kontakteve me njerëzit që kërkon kjo fushatë”, deklaroi ai.

Rama hodhi poshtë gjithashtu zërat se ndryshimet mund të kenë ardhur si pasojë e ndonjë kërkese nga aleati i tij Ilir Meta, dhe aq më tepër si pasojë e protestës së opozitës e cila për më shumë se tre javë po kërkon poshtë dritares së tij krijimin e një qeverie teknike që do të garantonte zgjedhje të lira e të ndershme.

“Këto ndryshime nuk kanë asnjë lidhje me shfaqjet elektorale që jepen, një orë paradite dhe një orë pasdite, në studion televizive që është instaluar këtu poshtë zyrës sime. Nuk ka lidhje as me deputetët e shkretë të PD-së që bëjnë turne nate me grafik, për të ruajtur studion dhe turfullojnë me njëri-tjetrin për pagesat e figurantëve të cilët mezi po i mbledhin për të duartrokitur liderin që nuk e kanë”, u shpreh kryeministri Rama.

Ndërkohe, pa humbur kryeministri shqiptar caktoi emrat e rinj që do të drejtojnë në muajt e fundit para zgjedhjeve Ministrinë e Brendshme, të Shëndetësisë, Mirëqenies Sociale dhe Çështjeve Vendore.

Në vend të Saimir Tahirit vjen kryetari i Komisionit të Ligjeve, Fatmir Xhafaj. Ilir Beqaj zëvendësohet nga ish-drejtoresha e QSUT, Ogerta Manastirliu,. Në vend të Blendi Klosit te Ministria e Mirëqenies Sociale shkon deputetja e Partisë Socialiste, Olta Xhaçka, ndërsa deputeti tjetër Eduard Shalsi zëvendëson Blendi Çuçin te Çështjet Vendore.