Rriten çmimet e qirave në Tiranë, ndër shkaqet – rënia e euros

Çmimet e qirave në kryeqytetin e Shqipërisë po vazhdojnë të rriten. Çmimi i referencës tashmë i rritur për taksën e pronës, kërkesa e lartë për apartamente me qira, rritja e popullsisë së huaj që banon në Tiranë, por edhe rënia e euros në raport me lekun, po konsiderohet se janë arsyet që kanë rritur me 20% qiratë gjatë vitit 2023.

Në zonën e Brrylit një apartament 1+1 kushton 300-350 mijë lekë të vjetra, një çmim ky i pranueshëm për ata studentë të cilët strehohen bashkë me studentë të tjerë, teksa në qendër të Tiranës, në zonat si Myslym Shyri, Rruga e Kavajës, apo Stadiumi Dinamo, çmimi më i ulët nis me 450 euro, shkruan TCH.

Përveç çmimeve të qirave, kushtet e agjencive imobiliare i detyrojnë qiramarrësit të paguajnë një shumë prej 1000 deri në 1500 euro, si depozitë dhe paradhënie për shtëpinë e marrë, e cila e vështirëson edhe më shumë situatën për këtë kategori, përcjell albinfo.

“Kushtet e agjencive kryesisht në Tiranë janë që minimumi i kontratës duhet të jetë 1 vjeçare, dhe paradhënia duhet të jetë 3 muaj, nga të cilat përfshihet, muaji i parë i qirasë, muaji i fundit dhe një muaj depozitë, për garanci për amortizimin apo dëmtimin e mobiljeve”, tha agjenti imobiliar, Erion Alimema, për TCH.

I pyetur për stabilizimin e çmimit të qirave, ai tha se pritet që çmimet të ngriten akoma më shumë.

“Aktualisht kërkesa vazhdon ta jetë e lartë dhe nuk mendoj që do ketë së shpejti stabilizim apo ulje të qirave, sepse të gjitha komplekset e reja që janë drejt përfundimit dhe shumë shpejt do jenë të banueshme, qiratë do jenë akoma më të larta së ç’janë aktualisht”, shtoi Alimema.

 

---