Scholz i rikujton Serbisë obligimin për zbatimin e marrëveshjes së Ohrit

Kancelari i Gjermanisë, Olaf Scholz, ka zhvilluar një bisedë telefonike me presidentin e Serbisë, Aleksandar Vuçiq.

Në njoftimin e Qeverisë së Gjermanisë thuhet se temë e diskutimit ishte statusi i marrëdhënieve dypalëshe, duke theksuar interesin e tyre të përbashkët, si dhe dialogun në mes të Kosovës dhe Serbisë.

“Scholz theksoi rëndësinë e dialogut të ndërmjetësuar nga BE-ja ndërmjet Kosovës dhe Serbisë dhe ritheksoi mbështetjen e vazhdueshme të Gjermanisë për të. Ai, gjithashtu, ia bëri me dije angazhimet e Serbisë për zbatimin e Marrëveshjes së Ohrit”, ka njoftuar zëdhënësi i qeverisë federale, Steffen Hebestreit.

Bëhet e ditur se Scholz edhe Vuçiq ranë dakord të vazhdojnë shkëmbimin e tyre të hapur dhe të qëndrojnë në kontakt.

“Kancelari dhe presidenti serb shkëmbyen mendime për statusin e marrëdhënieve dypalëshe dhe nënvizuan interesin e tyre të përbashkët për bashkëpunim konstruktiv dhe të orientuar drejt rezultateve”, thuhet në njoftim.