Serbët e veriut kundër zgjedhjeve

Përfaqësuesit e serbëve të veriut kanë deklaruar se nuk do të marrin pjesë në zgjedhjet e 3 nëntorit, të cilat derivojnë nga marrëveshja e 19 prillit e arritur në Bruksel

Përfaqësuesit tri komunave serbe të veriut, që bashkohen rreth një Kuvendi të ashtuquajtur Autonom, kanë marrë vendim që t’i bojkotojnë zgjedhjet e 3 nëntorit, të cilat  i ka shpallur presidentja e Kosovës, Atifete Jahjaga.

Sipas tyre këto zgjedhje bijën në kundërshti me Kushtetutën e Serbisë.

Sipas strukturave ilegale serbe, zgjedhjet e 3 nëntorit, janë në kundërshtim të plotë me Kushtetutën dhe ligjet e Serbisë dhe me rezolutën 1244 të OKB-së.

Madje, këta përfaqësues të veriut kanë akuzuar edhe Gjykatën Kushtetuese të Serbisë e cila nuk ka marrë vendim të qartë, nëse marrëveshja e Brukselit e arritur ndërmjet dy kryeministrave, Hashim Thaçi dhe Ivica Daçiq, është në kundërshtim me Kushtetutën e Serbisë.

Sidoqoftë, deklarimi i serbo-veriorëve se nuk do të marrë pjesë në zgjedhje ka rënë ndesh edhe thirrjen e Qeverisë së Serbisë për të marrë pjesë në këto zgjedhje, të cilat derivojnë direkt nga marrëveshja e Brukselit.

Ndryshe, zgjedhjet e përgjithshme lokale janë caktuar me 3 nëntor. Për të lehtësuar  pjesëmarrjen e serbëve të veriut në këtë zgjedhje është angazhua edhe Misioni i OSBE-së në Kosovës, i cili do të përfshihet në tri komunat e veriut dhe në Mitrovicën përtej lumit Ibër.