SHBA kërkon t’u jepet fund armiqësive në Ballkan

Departamenti Amerikan u ka bërë thirrje popujve të Ballkanit që t’i braktisin armiqësitë e vjetra, duke i dhënë përparësi paqes së vazhdueshme

Sekretari Amerikan i Shtetit, Rex Tillerson, u ka bërë thirrje të gjithë popujve të Ballkanit që “t’i braktisin armiqësitë e vjetra në mënyrë që paqja të mund të jetë e vazhdueshme”. Këto komente numri dy i Shteti amerikan i ka bërë dje gjatë fjalimit në Qendrën Wilson në Uashington.

Tillerson theksoi se Shtetet e Bashkuara të Amerikës e dinë se situata në Ballkan është “e brishtë” dhe do të vazhdojnë të punojnë “me partnerët në Bashkimin Evropian për të sjellë stabilitet, prosperitet dhe demokraci në rajon”.

“Shtetet e Bashkuara dhe bota dëshirojnë të shohin një gjeneratë të re të serbëve, kroatëve, shqiptarëve, shtetasve të Bosnjës, kosovarëve, dhe të tjerëve, që do ta falin të kaluarën, bile edhe nëse ata kurrë nuk do ta harrojnë atë”, tha sekretari amerikan i Shtetit në fjalimit të tij në Qendrën Wilson.

Ndryshe, Uashingtoni zyrtar disa herë ka ngritur shqetësimin se në Ballkan gjithnjë me më shumë po provohet ndikimi rus.