Shqipëri: Mbyllet votimi në 5 bashki, pjesëmarrja vetëm 18.4%

Është mbyllur procesi i votimit në pesë bashkitë e vendit, ku u zhvilluan zgjedhjet e pjesshme për kryetarë të rinj. Sipas Komisionit Qendror të Zgjedhjeve (KQZ), pjesëmarrja totale ishte vetëm 18.4%, një nga më të ulëtat në zgjedhjet lokale të viteve të fundit.

Në total, 334,539 qytetarë në bashkitë Vlorë, Berat, Cërrik, Mat dhe Tepelenë kishin të drejtë vote. Procesi nisi në orën 07:00 dhe përfundoi në orën 18:00, në përputhje me Kodin Zgjedhor. Sipas KQZ-së, votimi u zhvillua në mënyrë të qetë, me disa vonesa sporadike në hapjen e disa qendrave.

Vlora ka shënuar rekordin më negativ me rreth 13 për qind pjesëmarrje, ndërsa më e larta u regjistrua në Mat, me afro 40 për qind.

Në qytetet e tjera, niveli i daljes në votime ka qenë mesatar, me një interes të ulët sidomos në orët e paradites.

Kryekomisioneri Ilirjan Celibashi deklaroi se “grupmosha që ka marrë pjesë më shumë në votime është ajo mbi 65 vjeç”, ndërsa u vu re mungesa e dukshme e të rinjve. “Të rinjtë duket se e kanë braktisur procesin e votimit,” u shpreh Celibashi, duke shtuar se organizimi nga ana e KQZ-së është zhvilluar në mënyrë profesionale.

Në këto zgjedhje morën pjesë 13 kandidatë, që garonin për zëvendësimin e pesë kryebashkiakëve që lanë detyrën për shkak të emërimeve si deputetë apo ministra.

Partia Demokratike nuk mori pjesë me kandidatë nën siglën e saj, megjithëse disa prej kandidatëve të pavarur morën mbështetje nga strukturat lokale të opozitës.

KQZ ka njoftuar se numërimi i votave do të nisë pas orës 22:00.

Në Tepelenë, për herë të parë do të përdoret një projekt pilot me inteligjencë artificiale (AI) për vlerësimin e fletëve të votimit, megjithëse rezultatet përfundimtare do të dalin nga numërimi manual.

Celibashi tha se procesi është “i përgatitur mirë dhe i administruar sipas standardeve ndërkombëtare”, duke theksuar se suksesi i zgjedhjeve matet nga organizimi teknik dhe jo nga niveli i pjesëmarrjes.

Procesi u karakterizua nga disa episode të vogla – përfshirë vonesa në hapjen e disa qendrave në Vlorë, probleme me identifikimin biometrik të votuesve të moshuar dhe disa ankesa për intimidim në Cërrik, që u verifikuan nga policia pa u konstatuar shkelje të rënda.

Procesi i numërimit pritet të zgjasë deri në mesditën e së hënës, kur KQZ do të shpallë edhe rezultatet përfundimtare për pesë bashkitë.