Shqipëria në top-destinacionet më të mira të udhëtimit në Evropë

Në Shqipëri është përhapur shumë turizmi i aventurave, duke i tërhequr evropianët për ta vizituar

Shqipëria është bërë e njohur për turizmin e saj gjatë 30 viteve të fundit, pasi vendi ishte pothuajse totalisht i izoluar për shkak të sistemit komunist, që ra në fillim të viteve 90-ta, shkruan ‘tiranatimes.com’.

Me zhvillimin e turizmit si një sektor kyç i ekonomisë, autoritet e vendit dhe operatorët turistikë shohin se pushimet e aventurave si alternativa më e mirë për ka kthyer turizmin në një sektor shumë të rëndësishëm, përcjell albinfo.ch.

Shëtitjet malore apo raftin përgjatë kanioneve e bëjnë turizmin e aventurës në Shqipëri shumë të popullarizuar dhe që po fiton popullaritet në mesin e evropianëve.

Disa operatorë udhëtimi në natyrë ofrojnë ‘hiking’, ‘rafting’, ‘biking’, kalërim, kurse një rrugë e gjatë dhe e lashtë është ajo Via Egnatia që lidhte Romën me Bizantin apo Stambollin e sotëm, duke kaluar nëpër Shqipëri e Maqedoni.

Via Dinarica që kalon në shtatë vende të Ballkanit, është një tjetër destinacion i përbashkët turistik i vendeve të rajonit. Udhëtimi që bashkon tregjet e lashta dhe rrugët ushtarake që kalojnë Alpet Dinarike, u vlerësua nga prestigjiozja “National Geographic” si një nga udhëtimet më të mira 2017.

Ndërsa turizmi patriotik nga shqiptarët e Kosovës, Maqedonisë e Malit të Zi, ende llogaritet për më shumë se gjysmën e të ardhurave turistike, lokacioni gjeografik i turistëve është shtrirë gjithashtu në Greqi, Itali, Gjermani, Mbretërinë e Bashkuar, Francën dhe Zvicrën, edhe pse shumica e turistëve nga këto vende që vijnë kanë nënshtetësi të dyfishtë, njëra prej tyre shqiptare.

Industria e turizmit ka qenë njëra me rritjet më të shpejta të vendit në vitet e fundit, duke pasur rritje të madhe, dhe duke tërhequr më shumë se 4 milionë turistë në vit, apo duke gjeneruar rreth 1.5 miliardë euro.