Spanja në epërsi ndaj Austrisë në pjesën e parë, Oyarzabal zhbllokon sfidën

Kombëtarja e Spanjës ka mbyllur në avantazh pjesën e parë të ndeshjes ndaj Austrisë në 1/16 e finales së Kupës së Botës 2026, që po zhvillohet në stadiumin “Los Angeles” në Shtetet e Bashkuara të Amerikës.

Spanjollët kaluan në epërsi në minutën e 36-të, kur Mikel Oyarzabal realizoi pas një asistimi të Marc Cucurellas, duke finalizuar me goditje të menjëhershme brenda zonës për rezultatin 1:0.

“La Roja” dominoi në pjesën e parë, duke mbajtur rreth 62 për qind të posedimit të topit dhe duke krijuar më shumë raste shënimi. Më herët, një gol i Cucurellas në minutën e 29-të u anulua për ndërhyrje ndaj portierit austriak Alexander Schlager.

Austria pati momentet e saj, me Gregoritsch që iu afrua golit në minutën e 18-të, por pa arritur të konkretizojë. Në anën tjetër, Schlager u dallua me disa pritje të rëndësishme ndaj Lamine Yamal dhe Oyarzabal, duke mbajtur ekipin e tij në lojë.

Pas 45 minutave të para, Spanja është një hap më pranë kualifikimit në fazën e 1/8 së finales, ndërsa Austria do të kërkojë reagim në pjesën e dytë për të përmbysur rezultatin.