Tirana ekstradon nga Gjermania shtetasin shqiptar të dënuar për vrasje

Interpol Tirana ekstradon nga Gjermania një shtetas të dënuar me 25 vite burg për vrasje.

Si rezultat i bashkëpunimit të Interpol Tirana me Interpol Wiesbaden, u bë i mundur arrestimi dhe ekstradimi nga Gjermania drejt Shqipërisë, i shtetasit shqiptar Byniamin Hajro, 56 vjeç.

Ky shtetas ishte i shpallur në kërkim ndërkombëtar, pasi Gjykata e Apelit Vlorë në vitin 2017 e ka dënuar me 25 vjet burg për veprën penale “Vrasje me paramendim e kryer në bashkëpunim ” parashikuar nga nenet 78/1 dhe 25 të Kodit Penal.

Me datë 17.04.2012, është vendosur rifillimi i hetimeve në lidhje me ngjarjen e datës 03 06.1997, ndodhur në Berat ku u rrëmbyen dhe më pas u vranë shtetasit E.P. dhe A.A. Prokuroria në lidhje me këtë ngjarje ka filluar hetimet më 22.03.1998.

Gjykata e Apelit Vlorë në vitin 2017 ka deklaruar fajtor për këtë ngjarje shtetasin Byniamin Hajro duke e dënuar me 25 vite burgim.