Tragjedi në Gjevgjeli, tre refugjatë mbyten në lumë

Refugjatët kanë humbur jetën gjatë përpjekjeve për të kaluar lumin "Suva Reka", informojnë nga organizatat joqeveritare aktive në terren

Tre refugjatë kanë humbur jetën, ndërsa më shumë se 20 të tjerë janë shpëtuar gjatë përpjekjes së tyre për të kaluar në Maqedoni nga Greqia. Refugjatët kanë humbur jetën gjatë përpjekjeve për të kaluar lumin “Suva Reka”, informojnë nga organizatat joqeveritare aktive në terren.

“Tre persona janë mbytur në Gjevgjeli ndërkohë që po punohet në zbardhjen e identitetit të tyre. Ekipet janë në terren dhe po kryejnë hetimet”, konfirmuan nga Ministria e Punëve të Brendshme e Maqedonisë, e cila nuk jep detaje të tjera.

Organizatat joqeveritare informojnë se incidenti ka ndodhur mëngjesin e sotëm rreth orës 7:30 në të cilin dy burra dhe një grua kanë humbur jetën, ndërsa 23 persona janë nxjerrë nga uji dhe janë dërguar në qendrën transitore Vinojug ku po marrin ndihmën mjekësore, raporton AlsatM.

Në anën tjetër, mijëra emigrant kanë kaluar edhe një natë në shi dhe të ftohtë në zonën kufitare Greqi- Maqedoni. Ata jetojnë në kushte të tmerrshme. Më të prekur janë mijëra fëmijë, të cilët kanë mbetur në kampe pas bllokimit të kufirit dhe ashpërsimit të masave ndaj refugjatëve, të cilëve u është mbyllur rruga nëpër Maqedoni për të arritur në Evropë. Shumë emigrant presin në radhë për ushqime, ilaçe, veshmbathje dhe këpucë.

Refugjatët të revoltuar thonë se të kota janë këpucët që marrin kur dihet se nuk mund ta vazhdojnë udhëtimin e tyre.

“Na japin këpucë, por nuk na e hapin rrugën për të vazhduar më tej. Për shkak të reshjeve gjithçka është përmbytur dhe lufta më e madhe këtu bëhet për këpucë të thata. Ndërsa njëjtë situate është me ushqimin, duhet të luftosh për ta marrë”, deklarojnë mediet duke cituar refugjatët.