Trepça, pasuri e vdekur e Kosovës

 Presionet ndërkombëtare duket se kanë ndikuar në mosmiratimin e Strategjisë minerare, e cila parashihte që “Trepça” të ristrukturohej, ndërsa resurset t’i kalonin në pronësi shtetit të Kosovës, siç parashihet edhe në Kushtetutën e Kosovës.

Ndërkombëtarët përveç presioneve në Qeverinë e Kosovës kanë ushtruar presion edhe në komisionet parlamentare për stopimin e Strategjisë minerare. Të paktën kështu deklarojnë zyrtarë që kanë qenë të përfshirë në këtë proces.

Ish-ministrja e Energjisë dhe e Minierave, Justina Shiroka-Pula, ka thënë se Komisioni për Ekonomi, Tregti, Telekomunikacion dhe Energjetikë mban përgjegjësinë për gjendjen e tanishme, ndërsa sipas saj edhe vendimit të Dhomës së Veçantë i ka paraprirë  po ky komision.

Ajo ka thënë se Komisioni Parlamentar fillimisht e ka prolonguar më shumë se një vit miratimin e Ligjit për miniera dhe minerale. Kurse, sipas Pulës, Strategjinë minerare se bashku me planin për ristrukturimin e “Trepçës” dhe përgatitjen e saj për tërheqjen e investimeve e kanë kthyer në Qeveri, pa dhënë asnjë vërejtje bindëse.

Ethem Çeku, ish-anëtar i Komisionit Parlamentar ka thënë se Strategjia minerare është kthyer mbrapsht për shkak të mangësive që ka pasur dhe jo për shkak të presioneve ndërkombëtare. Ndërkohë edhe ish-kryetarja e Komisionit Parlamentar, Myzejne Selmanaj, ka thënë të mos ketë pasur presion prej ndërkombëtarëve për mosmiratimin e strategjisë.

Fatmir Rexhepi, anëtar tjetër i Komisionit, ka thënë të mos ketë pasur presione nga askush. Mirëpo, edhe ai ka dëgjuar për presionet për t’u kthyer strategjia.  Ndërkohë, “Koha ditore” ka siguruar një letër që shefi i Zyrës Civile Ndërkombëtare, Pieter Feith, i ka dërguar kryeministrit të Kosovës, Hashim Thaçit, në kohën kur pritej që strategjia të miratohej në Parlamentin e Kosovës.

Letra ishte dërguar më 12 tetor të vitit 2010, apo më pak se një muaj pasi që strategjia ishte dërguar tek deputetët për herën e dytë. Në fillim të letrës, Pieter Feith thotë se është i shqetësuar me zhvillimet brengosëse që kanë të bëjnë me sektorin e minierave.

Tutje në letër, Feith thotë se Ligji i ri për minierat i jep Qeverisë kompetenca për të formësuar zhvillimin e sektorit të minierave. Ndërsa, sipas tij, plani i fundit për ristrukturimin e “Trepçës” ka për qëllim të vërë pjesën më të madhe të sektorit të mihjeve në kontroll dhe pronësi të drejtpërdrejtë të Qeverisë.

Gazeta ka siguruar edhe letrën që ish-ministrja e Energjisë dhe e Minierave, Justina Shiroka- Pula, i kishte dërguar të parit të Qeverisë, por edhe përfaqësuesve të të gjitha institucioneve ndërkombëtare në vend, duke përfshirë shefin e ICO-së, Zyrës së Komisionit Evropian në Kosovë, FMN-së, Bankës Botërore.

Në letrën e saj, ajo lë të kuptohet se plani për ristrukturimin e “Trepçës” i ishte prezantuar edhe ICO-së dhe ky plan ishte hartuar edhe me ndihmën e ekspertëve ndërkombëtarë.