Turqia nuk do të stërvitet në “Fadil Vokrri” përpara ndeshjes me Kosovën

Ilustrim

Kombëtarja e Turqisë ka vendosur të mos zhvillojë stërvitje të plota në stadiumin “Fadil Vokrri” në Prishtinë para takimit të rëndësishëm me Kosovën.

Sipas planit të tyre, të hënën skuadra do të stërvitet vetëm në mëngjes në qendrën e trajnimit në vendin e tyre, pas së cilës do të udhëtojnë drejt Prishtinës. Në mbrëmje, lojtarët do të bëjnë një ecje simbolike në fushë, ndërsa më pas do të mbahet konferenca për shtyp me trajnerin dhe një futbollist të ekipit turk.

Nga ana e Kosovës, skuadra gjithashtu nuk do të zhvillojë stërvitje të plotë në stadium përpara ndeshjes, por do të kryejë vetëm një ecje të shkurtër në fushë, një praktikë e përdorur edhe në udhëtimet e mëparshme jashtë vendit.

Takimi mes Kosovës dhe Turqisë do të luhet të martën në mbrëmje dhe do të vendosë se cila skuadër do të sigurojë një vend në Botërorin 2026, që mbahet në SHBA, Kanada dhe Meksikë.