Paralajmërojnë mjekët e KFOR-it: Uji në Kosovë është kancerogjen

Mjeku ushtarak Ennio Lettieri ka raportuar para Komisionit Parlamentar italian se kontingjenti italian në Kosovë për një kohë të gjatë pinte ujë kancerogjen

Gazeta italiane “Il Giornale” ka dalë me një shkrim të jashtëzakonshëm e shumë shqetësues, ku tregon se uji i pijshëm në Kosovë është kancerogjen, përcjell albinfo.ch.

Mjeku ushtarak Ennio Lettieri ka raportuar para Komisionit Parlamentar italian se kontingjenti italian në Kosovë për një kohë të gjatë pinte ujë kancerogjen.

Sipas gazetës italiane kontingjenti italian në misionin e KFOR-it në Kosovë ka konsumuar, të paktën deri në vitin 2016, ujë kancerogjen. “Uji i analizuar në vitin 2015- 2016 përmbante bromate, një klasë kancerogjene 2B, në masën 65/97 mikrogramë-litër, krahasuar me një limit të toleruar prej 10 mikrogramë-litër.

Kur arrita në bazën e “Film City” në Prishtinë, më 14 tetor 2016 më thanë vazhdimisht për shijen shumë të dyshimtë të ujit të shpërndarë në restorantin dhe palestrën ndërkombëtare, si dhe piceritë në të gjithë bazën”, ka thënë ai.

Por, uji nuk është rreziku i vetëm për shëndet. Gjithashtu edhe oxhaqet e KEK-ut ndotin shumë ambientin, e kjo normalisht se ndikon në jetën e njerëzve që jetojnë në Kosovë.

Pluhuri që del nga termocentralet e atjeshme ka përbërës plumbi, fenol (shumë kancerogjenik) dhe kimikate të tjera, të cilat depozitohen disa kilometra larg deri në bazën e selisë së komandës së KFOR-it në Prishtinë dhe bazës e policisë sonë që është më afër.

---