Urim për Festën e Kurban-Bajramit nga Komuniteti Musliman Shqiptar në Zvicër

Mesazh paqeje, solidariteti dhe urimi për besimtarët shqiptarë në Zvicër me rastin e Kurban-Bajramit 2026

Komuniteti Musliman Shqiptar në Zvicër (KMSHZ) ka përcjellë urimin tradicional me rastin e Festës së Kurban-Bajramit, duke i drejtuar mesazh besimtarëve shqiptarë në Zvicër dhe më gjerë për paqe, mirësi dhe bashkim, transmeton albinfo.ch.

Në urimin zyrtar, kryetari i KMSHZ-së, Fehim Abazi, në emër të kryesisë dhe të gjitha qendrave islame shqiptare në Zvicër, ka uruar festën e madhe të Kurban-Bajramit për të gjithë besimtarët.

Ai thekson se Kurban-Bajrami është një nga festat më të rëndësishme në Islam, që lidhet me përmbushjen e Haxhit në Mekë dhe simbolizon përkushtimin shpirtëror ndaj Zotit, duke u bazuar në traditën profetike të Ibrahimit (a.s.).

Në mesazh, Abazi kujton sakrificën dhe besnikërinë e Profetit Ibrahim (a.s.), si dhe mesazhin e kësaj feste për shenjtërinë e jetës njerëzore, paqen dhe mëshirën hyjnore.

“Kjo festë na thërret të jemi zë i paqes, pajtimit dhe solidaritetit,” thuhet në urim, duke theksuar nevojën për ndërtimin e urave të bashkimit, respektit dhe mirëkuptimit mes njerëzve, si dhe refuzimin e urrejtjes dhe përçarjes.

Komuniteti Musliman Shqiptar në Zvicër u ka bërë thirrje besimtarëve që festën ta kalojnë në harmoni dhe gëzim pranë familjeve, duke mos harruar kujdesin për jetimët, të moshuarit, skamnorët dhe të sëmurët.

Në fund të mesazhit, KMSHZ ka uruar paqe, shëndet dhe begati për të gjitha familjet shqiptare, duke përmbyllur urimin me fjalët: “Gëzuar Festën e Kurban-Bajramit! Allahu ju bekoftë të gjithëve! Amin.” /Albinfo.ch

---